Ereindajan denda-topagunea inauguratu dute Bergaran

Gaur arratsaldean –domeka– inauguratu dute Ereindajan denda-topagune berria Bergaran. Eta bihartik aurrera egongo da zabalik. Besteak beste, bertako ekoizleek hazitakoa dute eskuragai.

Hitzordu xumea izan da, egitasmoaren bueltan dihardutenei zein Ereindajan ezagutu gura duen orori zuzendurikoa. Hori bai, jendez lepo zegoen denda-topagune berria. Asko izan dira proiektua ezagutu gura izan dutenak –ekoizleak, kontsumitzaileak, herritarrak...–.

Besteak beste, ingurukoei eskerrak emateko aprobetxatu dute hitzordua Ereindajanekoek: "Duela urtebete ekin genion proiektuari. Eta, ordutik, asko dira auzolanean esku hartu dutenak. Mila esker, guztioi! Gogorra izan da; baina, polita, era berean". Eta luntxarekin eman diete ongi etorria bertaraturikoei.

Gaurkoaren ostean, jendearen kontsumo ohitura "aldatzen" hastea dagokie. "Horretarako bitarteko da Ereindajan", diote. Bide horretan, ba, era askotako produktuak dituzte eskuragai: inguruko ekoizleek hazitako barazkiak, produktu ekologikoak... Horiek guztiak, egitasmoaren oinarrietatik ihes egin barik: "Bertakotasuna, osasungarri izatea, kontsumo eredu justua eta jarduteko era kooperatiboa ditugu zutabe". Denda-topagunea zabaldu aurretik, 160 bazkide ditu Bergarako Ereindajanek.

Bihartik aurrera

Gura duenak, bihartik aurrera izango du Ereindajanen erosteko aukera. Astelehenetik ostiralera bitartean, goizez –10:00etatik 13:00etara– eta arratsaldez –16:30etik 20:00etara– izango dute zabalik. Eta, zapatutan, ostera, goizean zehar egongo da bertan erosteko aukera –9:00etatik 13:30era–. Zapaterikuan dute egoitza.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.