Espoloian izango da jaia, 19:00etatik 23:00etara. Mery May eta Maitane bikoteak girotuko dute jaia, eta ondoren Azkaiter Peloxen txanda izango da. Tartean, Elvis Caino disko jartzaileak jarriko du musika. Musikaz hobeto gozatzeko, jatekoak eta edatekoak banatuko dituzte herritarren artean.
Komertzioen erronka
Horrez gain, 25 urteko ibilbidearen irudiak jarriko dituzte ikusgai Espoloian. Urte guzti hauetako bilakaera ikusteko aukera egongo da, hortaz. Izan ere, komertzio txikien egoera asko aldatu da urte hauetan. Bedelkarreko presidente Maitane Azkaratek azaldu du herriko komertzioak aldatu egin direla, eta "garai bateko erronkak eta gaurkoak" ezberdinak direla. Gaineratu du egun konpetentzia handia dutela interneten eta merkataritza-gune handiekin. Horren aurrean, komertzioen erronka da: "Gure eskaintza herritarrei ezagutzera ematea, herritarrak kanpora joan ez daitezen".
300 euroko zozketa
Zozketa berezia ere egingo dute. Astean zehar Bedelkarreko dendetan erosketak egiterakoan, txartel bat bete beharko da izena eta telefono zenbakia jarriz. Zapatuan, Espoloian, 300 euroko erosketa bonoaren zozketa egingo dute.
