21 bikote lehiatu dira Bergarako Udal pilotalekuan Euskal Herriko bikote gazteen 40. dantza suelto txapelketan. Txapelketak ez du formatu aldaketarik izan; urtero egiten duten moduan bikote bakoitzak fandango bat eta arin-arin bat dantzatu behar izan du. Dantzarien biltzarrak zehazten du txapelketaren formatua eta epaimahaia.
Parte hartu duten bikote ia gehienak gipuzkoarrak izan dira, bi izan ezik; bikote bat Sopelatik etorri da eta beste bat Gasteiztik.
Epaimahaiaren iritzia
Bikote guztien abileziak ikusi ondoren, epaimahaiaren iritzia iritsi da. Ondokoak izan dira sarituak:
- 1. Saria: garaikurra, txapela, zapia eta 180 euro. Maider Aginaga eta Iker Belintxon (Lezo).
- 2. Saria: garaikurra eta 160 euro. Itziar Bastida eta Anatz Lizartza (Azpeitia).
- 3. Saria: garaikurra 150 euro. June Elortza eta Eneko Sarasua (Azpeitia-Azkoitia).
- 4. Saria: garaikurra 140 euro. Elaia Elorza eta German Aranburu (Azpeitia).
- 5. Saria: garaikurra eta 130 euro. Enara Arrizabalaga eta Iker Sarasua (Azpeitia-Azkoitia).
Jantzi egokienari saria: garaikurra. Olatz Azkue eta Mattin Etxebeste (Lezo-Oiartzun).
Irabazleak pozik
Aginaga eta Belintxon bikotea pozik agertu da emaitzarekin. Sei urte daramatzate elkarrekin dantzan eta hori oholtza gainean igarri egiten dela esan dute. "Astean birritan entseatzen dugu, eta txapelketaren bat dagoenean gehiagotan", azaldu dute. Hirugarren aldiz jarraian txapela irabazteko sekretua "entseatzean" dagoela gaineratu dute. Aurten 15 urte dituztenez, datorren urtetik aurrera ezingo dute bikote gazteen txapelketan parte hartu –16 urtetik azpikoendako da–. Hortaz, nagusien txapelketan ahaleginduko direla esan dute.
Epaimahaiak kontuan hartzen duena
Nahikari Bizueta epaimahaikideak azaldu du bost puntu izaten dituztela kontuan dantzak baloratzerako orduan: pausoa egiteko duten teknika; gorputzeko goiko parteko mugimendua; alde artistikoa; erritmoa; eta, hutsegiterik dagoen. "Aginaga eta Belintxon bikoteak pausoan duen intentsitatea baloratu dugu, eta bikote osoa direla, harmonia handikoa" azaldu du Bizuetak irabazleen inguruan galdetuta.
Hirugarren aldiz jarraian txapela lortu dutela kontuan hartuta, nabarmen irabazi dutela pentsa daiteke, baina Bizuetak esan du ez dela horrela izan, "lehia polita" egon dela txapelketan.
