Herritarren galderak izan dira EH Bilduk gaur Bergaran egin duen kanpaina-ekitaldiko ardatzak. Koaliziaoaren Gipuzkoako zerrendaburu Marian Beitialarrangoitiak, zerrendan hirugarrena den Aitzol Cajaravillek eta Josu Juaristi eurodiputatuek erantzun diete galderei. Hala, Beitialarrangoitiak adierazi du Madrilera lanera doazela, eta hiru helburu nagusi aipatu ditu: "Kaltegarriak zaizkigun erabakien aurka egitera goaz, baina baita hemengo erabakiak defendatzera eta erabaki ahalmen handiagoa izateko tresnak eskatzera ere".
Aliantzen inguruan galdetuta, koalizioaren zerrendaburuak adierazi du ez dutela era isolatuan lan egin nahi, eta esparruen arabera elkarlanean aritzeko asmoa adierazi du: "Elkarlana, hemendik euskal herritarrak defendatzera doazen alderdiekin; Katalunia eta Galizia bezalako herrialdeak defendatzera doazenekin; eta ezker ikuspegia eta justizia soziala lantzera doazenekin".
EH Bilduko kideek beste hainbat gairen inguruan ere egin dute berba. Feminismoaz, esaterako, esan dute ez dela nahikoa Abortoaren Legea aldatzea, sistema errotik aldatu behar dela baizik; eta preso eta errefuxiatuen inguruan galdetuta, gakoa Madrilen baino gehiago, Euskal Herrian eta nazioarteko komunitatean dagoela erantzun dute. Ekonomiari dagokionez, bertako industria sustatu eta ikerkuntzan eta berrikuntzan indarra jarri beharra azpimarratu dute; eta Podemosi erreferentzia eginaz, kritikatu dute Murtziarako eta Euskal Herrirako proposamen ekonomiko bera egiten duenak, ez duela hemengo errealitatea ezagutzen. Pentsioak, LOMCE legea, gazteen inplikazioa eta TTIP-a ere izan dituzte berbagai Bergaran.
Gipuzkoan bigarren diputatuaren bila
Beitialarrangoitiak esan du, era berean, abendutik hona behetik gora datozen sentsazioa dutela, jendeagan beste animo bat aurkitzen dutela eta orain lan egin behar dutela inkestek diotenaren arabera posible den Gipuzkoako bigarren diputatua eskuratzeko.
