Omenaldi eta aldarrikapenetarako hitzordua izan da Askatasun Eguna

Maite Txintxurreta 2016ko ots. 29a, 15:00

Mikel Askasibar Aska preso bergararren etxeratzea ospatu eta gainontzeko euskal preso eta iheslariena eskatzeko Askatasun eguna ospatu zuten zapatuan Bergaran. Eguerdiko ordu batean, ekitaldi politikoa egin zuten lehenik Aranzadi ikastolako gimnasioan, eta horren ostean, poteoa, bazkaria eta kontzertua izan zuten bertaratutakoek.

Hasiera batean Irala kalean egin behar zuten ekitaldi politikoa lekuz aldatu behar izan zuten eguraldia zela eta. Maite Aristegi arduratu zen omenaldia zuzentzeaz.

Txalaparta doinuekin hasi zuten ekitaldia eta ostean bertsotan jardun zuen Aristegik berak, Mikel Askasibarri eta presoen senideei ongi etorria egiteko. Senideek loreak jaso zituzten eta aurreskua dantzatu zieten.

Askasibarrek mikrofonoaren aurrean etxekoei eta lagunei eskerrak eman zien, eta, era berean, jasotako elkartasun mezu guztiak eskertu gura izan zituen.

Maite Aristegik adierazi zuen Askaren etorrera Euskal Herriaren askatasunaren bidean pauso bat gehiago dela. Hala ere, ekitaldian gogorarazi zuten moduan, Bergarar batek preso jarraitzen du, Joxe Migel Gazteluk, hain zuzen. Hala, bere eta gainontzeko euskal presoen askatasuna aldarrikatzeko ere baliatu zuten zapatuko eguna.

Zapatuko ekitaldia eusko gudariak abestuz amaitu zuten, eta ondoren triki-poteoa eta bazkaria egin zuten. Bazkalostean, berriz, Mor More taldearen kontzertua izan zen.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak