Belintxon eta Aginagaren ondotik, Gorka Kerejeta eta Ania Irigoien azpeitiarrak izan ziren azpitxapeldunak; hirugarren postua, berriz, Nagore eta Julen Berrrondo errezildarrek eskuratu dute. Hogeita hemezortzigarren edizioa izan du aurtengo Bikote Gazteen Euskal Herriko txapelketak, eta Bergarako Musika eta Dantza eskolak antolatu du.
16 urtetik beherako neska-mutilek osatutako 17 bikote aritu dira guztira taula gainean. Ordu eta erdi inguru iraun duen ekitaldian, bikote bakoitzak bina dantza egin du, fandangoa eta arin-arina, hain zuzen. Guztiak pasatu ostean, Bergarako Musika eta Dantza eskolako dantzari, txistulari eta trikitilariek talde dantza bat egin dute erakustaldi modura. Horren ostean, txapeldunek, Iker Belintxon eta Maider Aginagak, azken dantza bat eskaini diete ikusleei. Bukatzeko, sari banaketa egin dute.
Irabazleek nabarmendu dute gaurko saioa "nahiko zaila" izan dela, "maila handia dagoelako". Gaineratu dute parte hartzaileen maila on horren ondorioz "urduritasun handia" izan dutela saio osoan zehar; hala ere, txapela lortuta pozik itzuli dira Lezora.
Bikote bergararra
Murgiondok eta Galarragak, bosgarren sariari zegokion garaikurraz eta 130 euroez gain, Bergarako bikote onenaren saria ere eskuratu dute. Gaurkoan parte hartu duen herriko bikote bakarra izan da, eta txalo zaparrada jaso dute harmailetan zegoen jendearengandik.
Murgiondok azaldu duenez, fandangoa "ondo" egin dute, eta arin-arina dantzatzen "akats batzuk" egin arren, garaikurra eskuratu ahal izan dute, eta "egindakoarekin gustura" azaldu dira. Herrian dantza egitearen berezitasunagatik galdetuta, Galarragak azaldu du publikoan lagunak ikusteak "animatu" egin dituela.
