Azaroaren 29an izango da Stoltz-Frères organoaren aldeko 2015-2016 egutegiko lehen emanaldia, Aitor Olearen eskutik. Olea San Pedro parrokiako organoaren jotzaile titularra da, baita haren aldeko elkartearen lehendakaria ere. Ordutik eta datorren urteko uztailera bitartean 15 kontzertu izango dira guztira. Denak Santa Marina elizan ospatuko dira, arratsaldeko 19:00etan. Sarreraren prezioa 5 eurotakoa izango da, eta lortutako dirua Stoltz-Frères organoaren konponketara bideratuko dute.
Elkarteko lehendakari Aitor Oleak adierazi duenez, taldean "oso pozik" daude pasa den kurtsoko emanaldiek izan duten erantzunarekin. Hori dela eta, oraingoan apustu handiagoa egitea erabaki dute, kontzertu gehiago antolatuz eta herriko taldeez gain, izen handiko bestelako musikari eta abeslariak ere gonbidatuz. Guztiek musutruk eskainiko dituzte kontzertuak, Oleak azaldu duenez.
Kontu zenbaki berria
Pasa den kurtsoko diru sarrerei dagokienez, guztira hamabi mila eta zortzirehun euroko sarrerak izan zituen elkarteak. Hala, diruaren erdia baino gehiago kontzertuetatik lortu zuten. Gastuak berriz, ia lau mila eurotakoak izan dira, mantenurako gehienbat.
Oraingoan, baina, kontzertuez gain, herritarrak diruzko dohaintzak egitera ere animatu nahi dituzte Organoaren Lagunak Elkartetik. Horretarako, bankuko kontu zenbaki berri bat jarri dute martxan: KUTXA ES90 2095 5070 7091 1532 9753. Bertara egindako ekarpenek zerga-arintze bat lortuko dute PFEZaren aitorpenean.
Konponketa zazpi fasetan
Bergarako Stoltz-Frères organoaren Lagunak elkarteko presidente Aitor Oleak azaldu duenez, organoaren konponketa eta berritze osoak 430.000 euro baino gehiagoko kostua izango luke. Epe ertainean diru kopuru hori guztia lortzea "ametsa" dela azaldu du; horregatik, konponketa zazpi fasetan egitea erabaki dute. Hala, lehen faseari ekiteko 100.000 euro lortu beharko dituzte.
Kontzertuen egutegi osoa
2015-11-29: Aitor Olea Juaristi
2016-01-17: Josean Pascual
2016-01-24: Mariatxen Urkia eta Jose Luis Frantzesena
2016-01-31: Esther Iñiguez
2016-02-14: Oscar Candendo Zabala
2016-02-21: Pedro Guallar Otazua
2016-03-13: Loreto Aramendi
2016-04-17: Alize Mendizabal
2016-04- (eguna zehazteke): Bergarako Orfeoia
2016-05-01 Marije Ugalde eta Gerardo Rifón
2016-05- (eguna zehazteke): Esteban Landart
2016-05- (eguna zehazteke): Bergarako eta Azpeitiko organo ikasleak
2016-06-19 Loreto Fdez. Imaz
2016-07-17: Bergarako Koru Parrokiala
2016-07-(eguna zehazteke): Benantzi Bilbao