Ordaindu plataformako kideen bisita izan zuten, gainera; euren mozioaren berri ematera joan ziren, eta bete egin zuten osoko bilkuren aretoa. Udal ordezkariek bat egin zuten haien eskaerekin eta aho batez onartu.
Fagor Etxetresnen itxierak kaltetutakoek eskatu zieten Udal ordezkariei mozio bidez bitartekari lanak egiteko, Mondragon taldea eurekin negoziatzeko eseri dadin. Jasandako kalteen berri bertatik bertara emateko aukera izan zuten Ordaindukoek eta Eskuratukoek, eta jendearen etsipenaren eta haserrearen berri jaso zuten udalbatzako kideek.
Kaltetuek duten informazio eza, aurrezkiak bueltatzeko ezezkoa eta egun lanik gabe dauden desgaituak kontratatzeko dituzten trabak, arazo ekonomikoa baino, borondate kontua dela diote plataformatik.
