Mari Karmen Barrenetxea hirugarrenez izango da Bergarako PSE-EEren hautagaia alkatetzarako. Bi legealdi daramatza zinegotzi lanetan, eta haren esanetan, zerotik hasi zen arren, asko ikasi du urteotan. Hirugarren aldia izanda ere, ilusioz jarraitzen du lanerako. Denis Itxaso, Gipuzkoako Ahaldun Nagusirako PSE-EEko hautagaia, ere bertan izan da, Barrenetxearen hautagaitza babesten. "Bergarako herritarrak zerbitzatzea erronka bat da. Baina bereziki apalenei, pertsona nagusiei, langileei, langabezia egoeran daudenei eta gure herria osatzen dugunoi zerbitzatzeak ilusioz betetzen nau", azaldu du Barrenetxeak.
Esan du, baita ere, udal politikak aplikatzeko modua ez dela inposaketa izan behar, eta hondakinen bilketari dagokionean, egungo Udal gobernuak hala jokatu duela."Ez dute jakin herritarrei entzuten, eta atez atekoa da horren eredu. Ikusi dugu herritarren gehiengoa sistema horren aurka dagoela, baina eurek euren bidetik jarraitzen dute, inposaketa gogor batekin. Beraz, nahiz eta egun osoa garbitzen pasa, zikin dago herria", argudiatu du Barrenetxeak.
Hori dela eta, aipatu du, alkatetzara iritsiko balitz, bere lehen proposamena atez atekoa alde batera utzi eta bosgarren kontenedorea ezartzea izango litzatekeela, hori bai, herritarrek hala nahi badute. Horrez gain, esan du ahulenen alde egingo duela lan, zaharren egoitzaren egoera hobetuz eta gazte, langabetu eta ekintzaileei lagunduz, besteak beste.
Azkenik, herritarrei laguntza eta babesa eskatu die, PSE-EEk proposatutako proiektua aurrera eramateko.
