San Joxepe elkartekoek aspalditik zuten buruan informatika gela egokitzea, baina irailean ekin zioten lanari. Tarte horretan, distribuzioa egokitu eta materiala berritu dute, besteak beste. Ordenagailuak La Caixa fundazioak eman dizkie.
Mahaiak, aulkiak eta pantaila San Joxepe elkarteak jarri ditu, baita eskulana ere. Azaldu dutenez, bakoitzak egiten dakiena eginez egin dio bere ekarpena proiektuari. Bergarako Udalak ere izan du bere rola auzolanean, ikastaroetarako erabiliko den proiektorea eskainita.
Hiru aldeak pozik agertu dira azken emaitzarekin, batez ere San Joxepekoak. Izan ere, aitortu dute, beste ekintza batzuen artean, informatika gela ere euren altxorretako bat dela.
Aurreko instalakuntzen aldean, oraingoan lau pertsona gehiagorentzako tokia izango da, hain zuzen, ikastaroek duten arrakastagatik. "Betidanik ibili izan da jende asko ekintza honen bueltan" dio Iñaki Zabala San Joxepe elkarteko zuzendariak, "ni hemen nagoenetik, 2.500 pertsona inguru pasa izan dira hemendik urtean zehar". Udalak ere "altxor" gisa ikusten du informatika gela berritua "jende nagusi askok ikasi eta praktikatzeko aukera dauka hemen, eta horiek guztiek jasoko dituzte proiektuaren onurak", dio Jaione Isazelaia alkateak.