Batzar orokorra egin du gaur, urtarrilak 11, taldeak Bergarako kiroldegian. Eta ondoren iazko denboraldiaren balorazioaren berri eman. 14 eta 48 urte bitarteko 68 kirolarik jardun dute Antxintxikarekin: 60 gizon eta 8 emakume. Rementeria presidenteak jakinarazi du emaitza "handiak" lortzea helburua izan ez arren lortu direla: "Ander Agirre, gizonetan, eta Lourdes Oiartzabal, emakumetan, izan dira Euskadiko duatloi zirkuituan lehenengoak. Eta Antxintxika Servimasa taldeen artean lehenengoa". Eta triatloian, bigarrena taldeen artean.
Euskal Herriko ia lasterketa guztietan
Datorren denboraldiari begira 70 kirolari daude. Eta Euskal Herriko ia lasterketa guztietan izango direla iragarri dute: "Bai duatloietan eta triatloietan; bai mendiko eta errepideko lasterketetan". Eta Euskal Herritik kanpora ere bai hainbatetan: "Jendea animatuta dago Nizako eta Lanzaroteko ironmanak egiteko".
Ateak zabalik dituztela triatloiaren mundua ezagutzeko jakinarazi dute: "Triatloia kirol gogorra dela pentsatu arren lasterketa gehienak ez dira hain gogorrak, eta gu zabalik gaude edonor hartzeko eta edonori laguntzeko", bukatu du Rementeriak.
Gero, trajea jantzi, eguraldi eskasari aurpegi ona jarri, eta argazkiak atera dituzte Bergarako kanpoko igerilekuan.