Esperantzatsu sartu dira Candyko langileak zuzendaritzarekin duten azken batzarrera

Miren Arregi Amasorrain 2014ko abe. 29a, 14:45

Bergarako Candy lantegiko langileen %80ak baiezkoa eman dio gaur goizean enpresako zuzendaritzarekin erdietsitako aurre-akordioari. Ondoren, eguerdian, zuzendaritzarekin batzartu da langileen batzordea –une honetan horrela jarraitzen dute–. Esperantzatsu eta poz aurpegiarekin sartu dira bilerara; gaur akordioa sinatuko den esperantzaz.

Aurre-akordioaren arabera, aurre-erretiratzeko adinean dauden Candyko langileak egoera "duinean" geldituko dira eta ez hori bakarrik, gainontzeko langileek bertan lanean segitzeko aukera ere bermatuta geldituko baita.

Foru Aldundiaren laguntza

Horrek ez du esan gura, betiere akordioa sinatzen bada, Candyko plantan orain arteko jarduerari eutsiko diotenik, izan ere, jarduera industrial berri bati ekin beharko zaio eta bide horretan, Gipuzkoako Foru Aldundiaren laguntza izango dute langileek. Enpresa batzordeak jakinarazitakoaren arabera, Diputazioko teknikariak arduratuko dira jarduera berrirako inbertsoreak bilatzeaz.

Dena ondo bidean, guztiendako enplegua

Dena ondo bidean, 80 bat lagunendako lanpostuak sortzeko aukera ikusten du enpresa batzordeak. Hain justu ere, aurre-erretiratuko ez diren langile guztiendako enplegua.

Gauzak horrela, momentu honetan mahai gainean dutenarekin pozik daude langileen ordezkariak, jakina, beto ere, adostutakoa gauzatzen bada.

Gaur eta bihar artean zerbait erdietsiko dela argi dute enpresa batzordeko ordezkariek; hala ezean, gogora ekarri dute epaitegietara joko dutela; hala, borrokatzen segitzeko asmo sendoa erakutsi dute.

Hemen enpresa batzordearen oharra

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak