Alai taldearen hasierako emanaldiak kalean izan ziren: Santa Ageda egunean eta Gabonetan kaleak girotzen ibiltzen ziren. Gerora, herriko auzoetako elizkizunetan eta hainbat ezkontzatan ere parte hartu dute. Ibilbide horrek isla izan zuen kontzertuan.
Elizako kantu birekin eman zion otxoteak hasiera; Lorenzo Perosiren O Salutaris Hostia eta Bepi de Marziren Signore delle cime abestiak kantatu zituzten lehenengo. Bost bat kantu herrikoi abestu zituzten gero; Alberto Mitxelenaren Ai hori begi eder eta Pablo Sorozabalen Maite, besteak beste. Deep river abesti beltz espiritualaren gaztelaniazko bertsio bat egin zuen ostean taldeak estreinakoz. Santa Agedako pare bat kantuk ere ez zuten hutsik egin errepertorioan eta Gabonetako beste bi abesti ere kantatu zituzten. Agur Jaunak kantuarekin borobildu zuten kontzertua eta publiko guztia zutik jarri zen abesti horren hasieran.
Herritarrak gustura
Txalo zaparrada luzeak jaso zituzten herriko abeslariek eta kontzertuaren amaieran herritarren zorionak eta esker hitzak jaso zituzten protagonistek. "Zoragarria izan da. Taldea aspaldikoa da eta niri betidanik gustatu izan zaizkit abestu dituzten euskal kantuak", azaldu zuen ikus-entzule batek kontzertuaren amaieran. "Asko gustatu zait.Errepertorioa egokia izan da nire ustez; Gabonetako kantak, Santa Agedakoak... Herrian ez dute sekula hutsik egiten eta espero dut jendea herrian eta baita herritik kanpora ere konturatzea zer daukagun bertan", zioen beste batek. Otxoteko kideak ere gustura gelditu ziren emanaldiarekin.
Justo Idigorasi esker hitzak
Alai taldeko zuzendari Xabier Olabarriak Justo Idigoras izan zuen gogoan zapatuko kontzertuan, urte askoan euren zuzendari bezala egindako lanagatik.
