Candyko langileak: "Birkolokatzeen inguruan enpresak esandakoa gezurra da"

Miren Arregi Amasorrain 2014ko aza. 25a, 14:16

Joan den astean langileen batzordeak eta Candyko zuzendaritzak izandako batzarraren ondoren, azken horrek ohar bat kaleratu zuen, langileak birkolokatzeko plan bat egiteko prest zegoela esanez. Bada, langileen batzordeak gezurtatu egin du hori, esanaz, enpresak eskaintzen duen gauza bakarra, lana nola bilatu laguntzeko zerbitzu bat dela.

Langileek jarraitzen dute lantegiaren bideragarritasunean sinisten eta hori berretsi dute gaur goizean Candy lantegiaren aurrean egindako agerraldian. Ez hori bakarrik, bideragarritasun hori posible dela frogatzen saiatuko baitira: "Ziur gaude Bergarako lantokia bideragarria dela, eta frogatzen saiatuko gara, denbora kontua da. Uste dugu itxiera aurretik diseinatu dutela, datuak makilatu dituztela irabaziak ezkutatuz".

Gaineratu dute, euren "ustea indartuta" dagoela Eusko Jaurlaritzarekin izandako bileraren ondoren, Jaurlaritzak berak esan baitie, "errentagarria izan daitekeela lantokia".

"Birkolokatzeena, gezurra"

Langileen batzordeak adierazi du, bestetik, joan den asteko bileran zuzendaritzak birkolokatze enpresa baten funtzionamendua azaldu ziela: "Birkolokazioen inguruan enpresak esandakoa gezurtatu gura dugu. Lana bilatzen laguntzeko azalpen bat eman digute, beste ezer ez, lanpostu bat bera ere ez", diote.

Hori horrela, enpresak "euren planarekin" aurrera egin gura duela diote langileek, "gidoitik atera gabe eta bideragarritasunaren inguruko eztabaidari uko eginez". Candyko zuzendaritzak bidalitako oharra "itxieraren bidean urrats bat gehiago da", langileen esanetan.

Datozen egunetako mobilizazioak

Bien bitartean mobilizazioetan jarraituko dute langileek; gaurko agerraldiaren ostean kotxe karabana egin dute eta hala egingo dute bihar ere, lantegiaren aurrean egingo duten konzentrazioaren ondoren. Bihar arratsaldean, 19:00retan, Irala kalean konzentratuko dira eta eguenerako manifestazioa deitu dute, 18:30ean, San Martin plazatik irtenda.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak