Bergarako EAJtako zinegotziek, EH Bilduk udalean eman dituen hiru urte eta erdi hauen balorazioa egin dute. Euren ustez, proiektu sendo bat eraikitzeko aukera galdu du gobernu taldeak. EAJk dioenez, EH Bilduk enpresekiko zerga politika gogortu du, sektoreak bizi duen egoera larrituz. Horrez gain, alkateak ez duela herriko ehun industrialaren egoera larria kudeatzeko iniziatibarik izan salatu dute.
Arazo ekonomikoei erantzun beharrean, jeltzaleen ustez, udal gobernuak arazo berriak sortu ditu. IBIaren errekarguarekin adibidez, dirua batu eta familien egoera estutu dutela diote. Horrekin batera atez ateko hondakin bilketak arazoak baino ez dituela sortu uste dute jeltzaleek.
Beste arlo batzuetan bezala, EAJren ustez, kulturan ere udal gobernua proiektu orokor gabe eta dirua xahutuz lan egiten ari da.
Arazo pertsonalengatik zinegotzi jeltzale guztiek egoteko aukerarik ez dute izan. Bukatzeko,azpimarratu dute gai desberdinen inguruan ia 80 ekimen proposatu dituzten arren, udal gobernuak ia guztiak baztertu dituela.