Oporretatik bueltan, auzoko jaietan murgilduta izan dira aste bukaeran osintxuarrak. Koloretsu hasi zituzten jaiak egubakoitzean. Bizikleta martxa egin zuten mozorrotuta eta munduko pintxoen dastatzea ere izan zuten, Osintxun dagoen kultur-aniztasunaren adierazgarri.
Gauean, berriz, musika izan zen nagusi. Azken urteotan kontzertu erakargarriak antolatzeko lana egin izan dute eta aurten ere halaxe izan da. Izaki Gardenak, The Potes eta Patxuko Nice taldeak igo ziren taula gainera. Kanpoko jende asko erakarri zuten.
Zapatua auzotarrendako
Zapatukoa, bestalde, auzotarrek disfrutatzeko eguna izan ohi da eta ekintza ugari izaten dituzte, esaterako: bertso poteoa, koadrilen arteko bazkaria, marmitako txapelketa, herri-afaria eta erromeria. Uste baino jende gehiago ibili dela azaldu du Jon Olivares auzo-alkateak, eta zapatuko erromeria goizeko ordu txikiak arte luzatu zela.
Domekan, besteak beste, meza, pilota partiduak eta poteoa izan zituzten jaiak bukatzeko.