Aipatu moduan, ezer egiteko aukera barik geratu ziren Santxo eta Urruzola. Norgehiagoka parekatua izan zen hasierako tantoetan; gainera, Santxorena izan zen lehenengo tantoa. Baina bina egin zutenetik aurrera, gorriek beste hamazazpi tanto egin zituzten jarraian. Arrietak erabateko protagonismoa hartu zuen aurreko koadroetan, zaleak ahozabalik uzteraino. Hamaika tanto amaitu zituen, eta beste bost egin zituen sakez. Jokalari onenaren saria eman zioten:
Eta, Santxok ezer gutxi egin ahal izan zuen erakustaldi horren aurrean. Kolpe ederra, besteak beste, datorren astean profesional moduan debuta egingo duen Urruzolarendako.
Lasai egon dadila, Bergarako Pilota Taldeko ordezkariek aitortu moduan, Irujok ere profesionaletara salto egin bezperan, Bergara Hiria txapelketako finala galdu egin zuelako. Hala, txapelak jantzita, eta Bergara jaietan, irabazleek ez zuten parranda egitea baztertu.
Nagusien finalaren aurretik gazte mailakoen lehia izan zen. Eta hor ere finalak ez zituen aurreikuspenak bete: Arteagak eta Erasunek 229 irabazi zieteneta Errandonea eta Martinezi. Arteagarendako izan zen jokalari onenaren saria, baina bere bikoteak ere txapelketa borobila egin du. Hala ere, Bergara Hiria txapelketak iraun duen hilabete eta erdi honetan, bi bikoteek erakutsi dute etorkizuneko pilotariak direla.