Atzo aurkeztu zuten Udaberri Egunaren lehen edizioa, erakutsi nahi dute komertzioak auzoaren parte direla eta erosketak herrian egitearen garrantzia azpimarratu. Bolua jai giroan murgilduko da zapatuan antolatu dituzten zenbait ekintzen bitartez.
Antolatzaileen ustetan, Bergararen herri egitura aproposa da auzoetan ekimenak antolatzeko. Gainera, auzoetan ekimenak sortzea aitzakia dira Bergarako herritarrentzat bertara hurbiltzeko; baita merkatarientzat ere, behar duten bultzadatxoa emateko. Hori dela eta, antolatzaileek Bergarako Bolua auzora gerturatzeko gonbita egin diete herritarrei. Askotariko ekintzak egongo dira, besteak beste, arte erakusketak, haurrentzako zein helduentzako tailerrak eta pintxo dastaketa.