Apiriletik azarora bitartean eskaintzen ditu Madrilego CNTravel agentziak Euskal Autonomia Erkidegoa bisitatzeko bidaiak. Euskal Herria, kultura eta natura izena du agentziaren eskaintzak eta aste betean, Araba, Bizkaia eta Gipuzkoako hainbat txoko bisitatzen dituzte, tartean, Bergara.
Astero iristen dira, beraz, Madriletik pare bat autobus Bergarara eta gaur ere hala izan da. San Martin plazan hasi dute bisita. Sarrera gisa, bergarako historiaren laburpentxo bat egin diete eta ondoren joan dira San Pedro parrokiara; han, Bergararen jatorria eta elizako ondarea ezagutu dituzte. Erdigunea ere bisitatu dute, erdi aroko estruktura: Goenkale, Barrenkale eta Artekale eta baita, besteak beste, Irizar jauregia ere.
CNTravel agentziako Begoña Ruizek esan duenez, bisitariak harrituta gelditzen dira Bergararen balio historiko kulturala tarteko. Eta ez hori bakarrik, Euskal Autonomia Erkidegoan bisitatu ohi dituzten tokietatik gustukoena ere izaten da Bergara.
Bergarako udalak ematen dien harrera ezin hobea ere nabarmendu gura izan du Ruizek. CNTravel agentziak ekainera arte eskainiko ditu EAEn barrenako bidaiak eta hala, Bergaran ere astero astero izango dira bisitari madrildarrak. Irailetik azarora bitartean ere etorriko dira.