Agerraldiaren helburua abiadura handiko trenaren obren egoera salatzea izan da; azken asteotan hainbat gora-behera egon dira horren inguruan eta zer hitz egin ere eman dute obrak. Rebeka Uberak gaineratu du, inora ez doan trena dela gainera. Abiadura handiko trena Europarekin lotura izango zela azpimarratu zuten proiektuaren bultzatzaileak; baina Frantziako gobernuak, 2032. urterako aurreikusten du Hego Euskal Herria eta Ipar Euskal Herria lotuko dituen zatia.
Horrez gain, datu ekonomikoen arabera trena diru xahutzea izan dela azpimarratu du Uberak. Proiektua aurkeztu zutenean 4,100 milioiko aurrekontuak onartu zituzten, eta dagoeneko, trenaren obren erdia ere eraiki ez denean, 4,600 milioi euro ordaindu dituzte.
Tolosa eta hernialdeko zatia
Tolosa eta Hernialde arteko zatian dagoeneko 9 milioi euroko arrazoitu gabeko gainkostua dagoela salatu du Uberak. Tolosa Hernialde zatiaren %77a eginda dago, eta dagoeneko gainkostua dagoela kontutan hartuta, EH Bilduk, Jaurlaritzari gaia aztertzeko eta kontu guztiak ikuskatzeko eskatu dio gaur bertan Herri Kontuen Epaitegian.
Segurtasun laboral txarra ere salatu dute. Dagoeneko sei langile hil dira obrak egiten eta aurrerantzean gertatu daitekeenaren beldur azaldu da EH Bildu. Amaitzeko EAJri leporatu diote ustelkeria zantzuetan ez dutela sakondu nahi, gainkostuaren arrazoiak, arrazoi teknikoak izan direla argudiatuz.
