Azoka Bergaratzen prozesuaren barruan, hezkuntzari eta, zehazki, umeen eta nerabeen aisialdiari eskainitako saioa izan zen zapatukoa. Hain zuzen, Oxirondoko azokako 1. solairuan guraso eta seme-alabendako aisialdigunea egin nahi da, eta parte-hartze prozesua ireki da.
Protagonismoa, umeei
Zapatuan, zenbait hitzaldi izan ziren adituen eskutik eta, segidan, taldeka, jendeak eztabaida saioa egin zuen. Nagore Narbaizak, Udaleko Hezkuntza teknikariak, honakoa esan zuen: "Kezka badago, eta hori oso positiboa da; galderak egitea eta mahai gainean jartzea, gauzak ondo egiten gabiltzan galdetzeko. Ondorioetako bat da umeei protagonismo handiagoa eman behar diegula. Joera daukagu gure ustez umeei gehien gustatzen zaiena antolatzeko, eta ez diegu berbarik ematen, eta, niretako, ondorio nagusietako bat hori da: umeen aisialdia antolatu behar bada, umeei berba ematetik abiatu beharko genukeela".
Beste bi batzar egingo dira eta lantaldeak sortuko dira, zapatuko ideietan sakontzeko.
