Bergara Garbia: "Aurretik genuen jarrera berdina mantenduko dugu eta protesta ekintza berriak antolatu"

Goiatz Arana Begiristain 2014ko urt. 30a, 15:35
Bergara Garbia plataformako hainbat ordezkari, eguerdiko prentsaurrekoan.
Bergaran hondakinak batzeko sistema berria martxan jartzeko bost egunen faltan, Bergara Garbiak prentsaurrekoa eskaini du. Bildu-Aralarri "inposaketa politikarekin jarraitzea" egotzi diote eta "bizilagunak isunekin kezkatuta egotea" lortu izana. "Gehiengoaren nahia bere gain hartu dezan" eskatu diote eta, bien bitartean, ekintza ezberdinekin jarraituko dutela eta protesta ekintza berriak antolatuko dituztela iragarri. Organikoa ateratzeko "Mankomunitatearen poltsa konpostagarriak erosi behar izatearen atzean", bestalde, "interes ekonomikoak" daudela salatu dute. Albiste barruan, irakurri duten prentsa-oharra, osorik.

"BEREHALAKO INPOSAKETA

Inposatu nahi diguten bilketa sistema  berehala martxan jarriko dutela jakin dugunez, Bergara Garbia herri plataformatik, atez ateko bilketa sistemaren aurka bozkatu zuten 4.771 bergararren ordezkari gisa, ondorengo adierazpenak egin nahi ditugu:

Bergarako Bildu-Aralarrek inposaketa politikarekin jarraitzen du, bergararren nahi eta iritziak kontuan izan gabe.

Gainera, kuboak jasotzera behartu nahi izan gaituzte behin eta berriz bidali dizkiguten eskutitzekin (1.800 eskutitz banatu dira, kuboak jaso ez dituzten familien artean) honen aurrean, guk aurretik genuen jarrera berdina mantenduko dugu; ez jaso kuborik, eta jaso dituzuenok ez erabili. Bestalde, beldurraz baliatuta inposatu nahi dute Bildu-Aralarrek beren sistema, isun ekonomikoak ezarriz, bergarrak bildurtuz eta sistema erabiltzera behartuz, eta ondorioz, bizilagunak isunekin kezkatuta egotea lortu dute.

Baina, Debagoienako Mankomunitateak atera duen ordenantza aztertu ondoren, ondorengo ondorioak atera ditugu (21-24 artikuluetan) organikoa Mankomunitateak eskainiko dituen poltsa konpostagarrietan atera daitekeela eta errefusa edozein plastikozko poltsetan. Poltsa hauek lurrean utziko ditugu, ezartzen dituzten egunak errespetatuz, txintxilikarioen alboan.

Bildu-Aralarri exijitzen diegu, gogoeta egin dezan eta 5. edukiontzia ezarri dezan, Legazpin bezalaxe, bi bilketa sistemen arteko  emaitzak alderatzeko. Gobernu taldeak biztanleriaren gehiengoaren nahia bere gain hartu dezan nahi dugu, demokratikoki. Bien bitartean, ekintza desberdinekin jarraituko dugu eta protesta ekintza berriak ere antolatuko ditugu  herritarron nahia lortu arte.

Berriz ere, Bergarako Bildu-Aralarren gobernatzeko era diktatoriala salatu nahi dugu. Bilketa selektiboa bultzatzeko sentsibilizazio kanpainak egin eta herritarren partaidetza bultzatu beharrean zaborraren arazoari konponbidea aurkitzeko, beste garai bateko errezeta ezarri nahi digute, erabaki eta agindu inor kontutan hartu gabe, sistema garesti, zikin eta atzeratua inposatuz.

ZERGATIK ARRASATEN BAI ETA BERGARAN EZ?

ATEZ ATEKORIK EZ, 5. EDUKIONTZIA BAI

INPOSAKETARI EZ! ATEZ ATEKOARI EZ"

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak