Pare bat aste barru mugituko dira San Martingo Haur Hezkuntzako umeak eraikin berritura

Bergaran, amaitzear daude Martinez Irala berriztatzeko egin beharreko obrak. San Martin Agirre eskolako Haur Hezkuntzako umeak joango dira eraikin berritu horretara, hemendik pare bat aste barru, lan guztiak amaitutakoan. Guztira, 2 eta 5 urte bitarteko 210 haur inguru izango dira eraikin berrituan.

San Martin Agirre eskolan dagoeneko pasa dira 12 urte inguru toki arazoekin hasi zirela, baina 2012. urteko abuztu amaieran hasi ziren Martinez Irala berriztatzeko obrekin eta bertara eramango dituzte Haur Hezkuntzako ume guztiak.

Dagoeneko, ikasturte hasieratik daude bertan 2 urtekoak, eraikin txikian, hain justu, eta jangela ere martxan dago erdiko eraikineko beheko solairuan. Ondorengo astetan joango dira bertara 3, 4 eta 5 urteko umeak. Eurendako goiko solairua egokitu dute eta adin bakoitzeko hiru gela izango dituzte. Espazio guztiak Haur Hezkuntzako umeendako egokitu dituzte.

Lanen azken txanpan

Dagoeneko obren azken txanpan sartu dira eta asmoa da hemendik pare bat aste barru Haur Hezkuntzako ikasle guztiak eraikin berritura pasatzea.
Haur Hezkuntzako 210 haur inguru izango dira eraikin berrituan eta horrek onurak ekarriko ditu gaur egun arte izan duten Agorrosin ondoko eraikinean, izan ere, bertako espazio guztia Lehen Hezkuntzako gaztetxoendako izango da aurrerantzean.

Inaugurazioa ikasturte amaieran

Inaugurazio festa bat ere egingo dute eraikin berritua martxan dagoela ospatzeko eta baita bidelagun izan dutenei eskerrak emateko. Inaugurazio festa hori maiatza edo ekainean izango dela aurreratu digu San Martin Agirreko Begoña Otsoa-Aizpurua zuzendariak, behin haurrek eraikina eurena egin ostean egingo dute festa, beraz.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.