Eneko Ioldik pronostikoak bete eta Soraluce torneoko lau t'erdiko txapela jantzi zuen atzo iluntzean Bixintxo Bilbaori 22-15 irabazi ostean. Hala, duela bi urte finalera iritsi eta Onsaloren kontra galdu zueneko arantza atera ahal izan zuen Ioldik. Giro polita izan zen pilotalekuan, eta ikusleen pilota-gosea ondo asetu zuten finaleko protagonistek, lehia ederra izan zelako. Parean egon ziren indarrak, biak ala biak aurretik ibili ziren markagailuan, boladaka jokatu zuten eta tanto asko bikain amaitu zituzten. Hirugarren sailkatzeko lehian Ander Mugurutza bergararrak 22-8 irabazi zion Jakari.
