Emakume Txokoko Irakurketa Feministen Taldearen hamargarren urteurrena ospatu dute, Arrasaten egindako topaketarekin. "Urtebetetze festa izan da guretzat. Topaketa bat eginez ospatu genezakeela pentsatu genuen, eta egia esan, egunak eman duenarekin oso pozik gaude. Asebeteta", esan dute Arrasateko taldeko kide Mirian Domingos Serranok eta Eneritz Ugalde Baraiazarrak.
Sei liburu
Emakume Txokotik egindako topaketara, etxeko taldeko kideez gain, Bergarako, Aretxabaletako, Tolosako, Hondarribiko, Hernaniko, Bermeoko eta Gasteizko irakurleak batu dira, sei libururen bueltan jarduteko. Dinamizatzaile batek gidatuta, talde txikietan jardun dira lehenengo, eta ostean, hausnarketa bateratua egin dute.
Topaketaren klownklusioak Bea Egizabalen esku etorri dira. "Indar erakustaldia egin dugu, gaur eta hemen. Oso inteligenteak zaretela erakutsi duzue, gainera. Segi irakur zaletasun feminista egiten eta zabaltzen".
