Durangoko Astarloa, Donostiako Ozenki eta Errenteriako Karnaba otxoteak gonbidatu ditu Txorbelak, Arrasaten egin den III. Otxote topaketara. Zazpi urte igaro dira azkenengoz Arrasaten Otxote topaketa egin zenetik, eta Txorbelako kide Mikel Balanzategik adierazi du "gogo handiarekin" prestatu dutela eguna. Bina kantu abestu ditu otxote bakoitzak San Frantzisko elizan, eta azkenengo biak denek batera abestu dituzte. Ostean, alde zaharreko txoko ezberdinetan banatu eta tabernetan kantuan ibili dira guztiak. Txoko, Ezkiña, Irati, Aterpe, Kajoi eta Plus Ultra tabernetan ibili dira, besteak beste.
Ohitura galduaz
Balanzategik dio Otxoteen egoera gaur egun ez dagoela oso osasuntsu. "Ohitura galduaz" doala dio, "koru mistoak daudelako" eta "otxoteen errepertorioa ez delako oso zabala". "Guk jarraitzeko asmoa dugu, baina ondo legoke norbaitek otxoteendako partitura berriak lortzea; izan ere, gaur egungo errepertorioa duela urte dezente sortutakoa da" adierazi du Balanzategik.