Erakundeetako eta Mondragon-eko ordezkari, bazkide eta bazkide ohi, langile, bezero, kolaboratzaile, hornitzaile eta kooperatibako beste aliatu batzuk batu dira Mondragon Lingua-Alecopen (MLAKOOP) 60. urteurrenean. Ospakizunak izaera instituzional nabarmena izan du, baina aldi berean hurbila eta hunkigarria ere izan da. Topagune izan da MLAKOOP-en sei hamarkadako ibilbidearen parte izan diren pertsona eta erakunde guztiei aitortza eta esker ona adierazteko.
Kooperatibaren ibilbidea errepasatu dute: 1966an On Jose Maria Arizmendiarrietaren inspiraziopean Alecop sortu zenetik, CIM Arrasateko Hizkuntza Zentroaren (gerora Mondragon Lingua) bilakaeraraino. "Arrasaten sortutako bi proiektu, eremu desberdinetatik jardun arren, bokazio bera partekatu dutenak: ezagutza pertsonen, erakundeen eta gizartearen zerbitzura jartzea", azpimarratu dute. Era berean, MLAKOOP-em bideo korporatibo berria aurkeztu dute.
Etorkizunerako erronkak
Atzera begiratua egiteaz gain, etorkizunera begira ipintzeko erabili dute ekitaldia. Alegia, kooperatibaren etorkizuneko ildo nagusiak. "Jarduera-esparru desberdinetatik eraikitako proposamen anitz batean oinarritzen da: Hizkuntza Prestakuntza, Talentua, Prestakuntzarako soluzio teknologikoak, Itzulpengintza & Komunikazioa, Industria Muntaketak eta Mexikoko Mondragon Unibertsitatea".
Eta, gaineratu dute, kooperatibak erakundeendako funtsezkoak diren erronkei erantzuten jarraitu gura duela: "Pertsonen garapena, talentua erakartzea eta fidelizatzea, etengabeko prestakuntza, nazioartekotzea, komunikazio eleaniztuna, prestakuntzaren eraldaketa teknologikoa eta hezkuntzaren, enpresaren eta industriaren arteko lotura. Etapa berri horretarako funtsezko ideia bati eusten diogu: erakunde
bakoitzaren benetako beharretara egokitutako irtenbide erabilgarri eta hurbilak sortzen
jarraitzea, gure sustrai kooperatiboei eta ingurunearekiko konpromisoari eutsiz".