Bero itogarria izan da, bi hitzetan esanda, 2026ko San Juan jaietako protagonista nagusia. Azken eguna geratzen zaio jai egitarauari, eta, eguraldia zertxobait freskoagoa izanda eta egubakoitza tokatzen denez, festa girorik ez da faltako oraindik; azken urteetan Herriko Plazako kontzertuarekin amaitu izan dira jaiak –aurten, La Perra Blanco taldearen txanda izango da–, baina Txosna Batzordeak Etxepe, La Txama eta Merina Gris gonbidatu ditu sanjuanak borobiltzeko.
Aldaketa ugari lehen bi egunetan
Beroa izan da protagonista, egun eta gau, eta Jaurlaritzak ezarritako alarma gorriak hainbat aldaketa eragin ditu egitarauan. San Juan bezperan, aldaketa hauek izan ziren Udalak egindako esanguratsuenak: barraken ordez jarritako umeen puzgarriak urezkoak izan ziren; San Juan bezperako gazte bazkaria Seber Altubetik Azoka Plazara aldatu zuten –azoka bera babesgune klimatiko bezala ireki du Udalak, goizean goizetik 19:00ak arte–, eta baita umeendako arratsaldeko disko-festa Seber Altubetik Zaldibarko zuhaitzen azpiko parkera ere; makalaren igoeran udal langileak mahuka edo mangerekin ibili ziren gazteak bustitzen –eta baita zenbait herritar ere balkoietatik ur baldeekin–; errementari dantzaren ibilbidean bi geldialdi gehitu zituzten eta Udaleko langileek botila urak banatu zituzten, dantzariak eta musikariak hidrata zitezen; sute arriskuagatik San Juan suak piztea debekatu zuen Udalak, Herriko Plazako sua izan ezik –eta su hori ere ohikoa baino txikiagoa izan zen–.
San Juan egunerako ere neurri bereziak hartu behar izan zituen Udalak: 80 urtetik gorakoei urtero antolatzen zaien omenaldia bertan behera geratu zen, eta laster iragarriko dute data berria; Arrasate Musikaleko bandaren kontzertua Monterron parketik San Frantzisko elizara aldatu zuten; arratsaldeko zezen-plazako errekortarien erakustaldia suspenditu egin zen, antolatzaileek hala eskatuta eta Udalak egoki baloratuta –sarrerak aldez aurretik erosi zituztenei dirua nola itzuliko zaien datozen egunotan jakinaraziko zaie–; San Juan eguneko beste klasikoetako bat diren su artifizialak ez ziren bota, sute arriskuagatik, eta edozein motatako piroteknia ere debekatu zuten, entzierroak hasteko eta amaitzeko suziriak izan ezik "funtsezko segurtasun-elementuak" direlako. Horrez gain, San Juan egunez itxita egon ohi den Musakolako igerilekua ireki zuen Udalak, arratsaldez.
Atzo ere eragina
23koa eta 24koa izan ziren egunik beroenak, 40 graduko tenperaturarekin. Atzo ere egun beroa izan zen, eta aldaketaren bat edo beste izan zen egitarauan; aipagarriena, Monterronen egitekoak ziren Porrotx, Marimotots, Pupu eta Loreren ikuskizuna Amaia antzokira lekualdatu zutela. Hala, ume eta gaztetxoen eguna izanik, 12 eta 16 urte artekoendako egitaraua izan zen Zaldibarren, eta 30 urte bete dituen Eguzkilaruk abentura parkea jarri zuen Monterronen eta jolasgunea Biteri plazan. Eguneko beste ekintza Zeuk iñ, zeuk jan bazkaria izan zen; 1.000 lagun inguru elkartu ziren Portaloian, Udalak jarritako sagardo upel eta Joxe Mendizabal soinu-joleak girotutako bazkaloste eta guzti; 2012an egin zuten lehen aldiz, eta arrakasta handia izaten du.
Gertaera aipagarririk ez
Udaltzaingoaren arabera, ez da gertaera aipagarririk edo larririk izan, "parranda giroan gertatu ohi direnez harago". Bero kolpe bategatik, adibidez, ikusle bat artatu behar izan zuten osasun zerbitzuek errementari dantza Portaloi ingurura heldu zenean. Bestalde, eraso matxistei aurre egiteko gunean ez zen salaketarik izan ekainaren 23ko eta 24ko gauetan.
Olinpiadak eta jaioberriak
Jaietako egunak aste barruan tokatu direnez, ekainaren 20an egin ziren III. Gazte Olinpiadak. 68 talde eta mila gazte –eta ez horren gazte– elkartu ziren, eta Lolailo taldeak eskuratu zuen Arrasateko bandera. Bestetik, ekainaren 21ean egin zen aurtengo nobedade nagusia izan den ume jaioberriei ongietorri ekitaldia. 2025eko jaietatik aurtengoetara 173 arrasatear jaio dira. Aurrerantzean, ezingo dira sanjuanak ulertu bi ekitaldi horiek barik.