Abao Komunikazio Agentziak ekoiztuta, Sona ikus-entzunezko produktu berria argitaratu du gaur Guau EITBren audio plataformak. Lehenengo saioa ikusgai dago jada, J Martina taldeko Ane eta Kattalin Barcena protagonista dituena. Haien ostean igaroko dira saiotik, besteak beste, Kaparrak taldea, Julen Goldarazena Flako Fonki, Silitia, Mirotz eta Hodei Barroso.
Bistan denez, lurralde eta estilo ezberdinetako artistak izango dira protagonista, euskal musikaren aniztasuna eta aberastasuna erakutsiz. Helburua "Euskal Herriko mapa musikala osatzea" izango dela adierazi du Goñik. Guztira hamar talde edo bakarlari gonbidatuko dira, eta bakoitzak beste artista, talde edo musika-eszena batzuk proposatuko ditu, "mapa musikal kolektibo hori osatzen laguntzeko".
