Gehienbat Udaltzaingo zerbitzutik garatu dute Zirkulazio Ordenantza proposamena eta gaur aurkeztu dute hedabideendako egindako agerraldi batean. Bai Mugikortasun zinegotziak bai Arrasateko Udaltzainburu Zigor Andinok ezinbestekoa ikusi dute ordenantza eguneratzea gainetik dauden arautegietara egokitzeko eta bertako errealitatera ekartzeko.
Mota desberdinetako ibilgailuek plataforma berdina partekatzen dutenean sortzen dira arazo handienak udaltzainburuaren esanetan. Besteak beste, patinete elektrikoen erabilera handitu egin da, eta "araudia eguneratzea" eskatzen du.
Irail amaieran egon daiteke indarrean
Ordenantza berriak errespetuzko bizikidetza bultzatzea du helburua Mugikortasun zinegotzi Garazi Etxeberriaren esanetan. Bertan, hiriko bideen tipologia sailkatzen da. Horrekin batera, askotariko ibilgailuen eskubide eta betebeharrak zehazten dira: izan automobilak, karga eta deskargako kamioiak, autokarabanak, ziklomotorrak, patinete elektrikoak, bizikletak, zein oinezkoak.
Ordenantza egueneko osoko bilkuran onartzen bada, alegazioak aurkezteko 30 lan eguneko epea zabalduko da eta irail amaierarako indarrean egon daiteke. Lehenago, herritarrei azaldu beharko zaie zeintzuk diren aldaketa nagusiak.