Arrasateko Arizmendi ikastolakoak, Bergarako Mariaren Lagundiakoak edota Oñati Institutuko ikasleak izan ziren besteak beste parte hartzen; eta erronka batzuk ondo eta beste batzuk zailtasun gehiagorekin egin zituzten.
Trebetasuna eta parte-hartzaileen arteko elkarlana ikusi ahal izan ziren Iturripen eta gaztetxoak ilusioz jardun ziren erronkei aurre egiten. Gomendatzeko moduko ekimena dela azpimarratu zuten.
Gaztetxoen lana gertutik jarraitzen
Innobasque Berrikuntzaren Euskal Agentziak antolatzen du First Lego League, eta bertako, Mondragon Unibertsitateko edota Arrasateko udaleko ordezkariak ere izan ziren Iturripen. Nola ez, gaztetxoen gurasoek ere gertutik jarraitu zituzten seme-alaben erronkak eta lanean aritu zirenendako ere egun polita izan zen.
Gazteen artean zientziarekiko eta teknologiarekiko interesa piztea helburu duen lehiaketa, zazpigarren aldiz jokatu da Arrasaten.
