Gonbidatuen artean izan ziren Emakundeko zuzendari Miren Elgarresta, Arrasateko alkate Maider Morras, Eusko Jaurlaritzako Kultura eta Hizkuntza Politika Saileko nazioartekotzeko aholkulari Arantzazu Rojo eta Laboral Kutxako Karmele Segura, besteak beste. Guztiek azpimarratu zuten txapelketak izandako ibilbidea eta garrantzia.
Erreferente izatera
Babesle eta eragile guztiez gain, ekitaldian, txapelketan diharduten ia pilotari guztiak izan ziren, tartean Debagoieneko hainbat ordezkari: Arrate Bergara bergararra, Irati Betegi aretxabaletarra eta Maddalen Etxegarai oñatiarra, besteak beste. Emakume Master Cupek sortutako iraultzaren ostean, gero eta gehiago dira umeak direla esku pilotan hasten diren neskatilak. Hala, pilotan emakumezko erreferenterik ez izatetik, beraiek erreferente izatera pasatu dira.
Hamarkada bateko ibilbidea ospatzeko baliatu zuten Arrasateko ekitaldia, eta urteurrenaren harira kamiseta berriak eta emakumeentzako frakak aurkeztu zituzten "10 urteko ibilbide polit eta oparoa" irudikatuz.
