Arrasateko eraikin bateko atarian gizon bat zaurituta zegoela esanez abisua jaso dute ertzainek 11:30ak bueltan. Azken horien esanetan, su-armaz egindako zauri bat zuen, eta senide batek Debagoieneko Ospitalera eraman du. 61 urteko gizona da zauritua eta Arrasateko Ospitalean ebakuntza egingo diote. Lekukoek pistola-bala bat aurkitu dute lurrean.
Udaltzaingoa eta Ertzaintzaren Herritarren Babeserako patruilak eta Brigada Mugikorreko Berehalako Erantzuneko Patruilak (PRI) joan dira gertakarien lekura, "ingurua babesteko eta beste inor ez dela kaltetuta egiaztatzeko". Horretarako, kalea moztu dute. Ordubete inguruko polizia-operazioaren ostean, Brigada Mugikorrak alde egin du. Ertzaintzaren unitate zientifikoa eremua ikertzen ibili da, gertakarien arrazoiak zehazteko.
Hain zuzen ere, gertatutakoari buruzko lehen ikerketei esker, ertzainek 55 urteko gizonezko bat identifikatu dute. Deba Urolako ertzain-etxean atxilotu dute, gertakariarekin zerikusia duelakoan.
