Guztira 70 lagun inguru aritu ziren umeendako, filmetako, beste herrialde batzuetako nahiz egungo euskal musikagileen kantuak abesten. 590 euro batu zituzten, eta Harremanendako urteko hitzordurik berezienetakoa izaten da. "Urte asko daramatzagu eta berezia da. Azkenean, musikak eta soinuaren ahalmena kontzientziaziorako balio duen erraminta moduko bat da", zihoen Harreman elkarteko kide Elixabete Uriartek.
Goikobaluko lau taldeak elkartzen diren emanaldi bakarra izaten da eta gainera, urteko lehendabiziko kontzertua izan zen eurendako. Goikobalu Txikiko zuzendari Txomin Maidaganen esanetan, kontzertu solidarioetan parte hartzea aberasgarria da.
Kontzertuak Harreman elkarteari egiten duten lana ikusarazten laguntzen dio, eta emanaldi solidarioan batzen den diruarekin benetako beharra duen jendeari laguntzen diete. 2005a ezkero, Mozambikeko eta Indiako bi proiektutara bideratzen dute jasotzen duten diru guztia, eta aurten ere halaxe egin dute.
