Gaur –otsailak 2– hasi dira San Andres auzoko Gaztetxokoa eraberritzeko obrak. Kurtzetxiki plazako 2. zenbakian kokatuta dagoen lokala, 1994an ireki zen, eta, Gladys Fernandez, Belaunaldiartekotasun zinegotziaren arabera, "beharrezko" lanak dira honakoak: "Jarduketa honen helburua da espazioa egokitzea eta bertan garatzen den jarduera behar bezala legeztatzea, segurtasun, irisgarritasun eta erosotasun baldintzak hobetuz".
Lan hauen baitan, lokalaren barne-distribuzioa aldatuko da, akaberak eta instalazioak berrituz. Kanpoko arotzeriak ere ordezkatuko dira, lokalaren ezaugarri termikoak eta akustikoak hobetze aldera. Irisgarritasunari dagokionez, sarreran eta komunetan dauden koskak kenduko dituzte. "Erabilera publikoko gela guztietan irisgarritasuna bermatuko da. Gainera, lokalaren perimetro osoan trasdosatua egingo da, dagokion isolamendu termikoarekin, eta sabai akustiko aizuna jarriko da jardueraren erosotasun-baldintzak hobetzeko", gehitu du Fernandezek.
Lan hauek garatzeko, 176.159,68 euroko aurrekontua bideratu du Udalak, BEZa barne. Bestetik, 23 astetan obrak amaituta egotea aurreikusten da, eta Zamakoa SA enpresak izango du horiek gauzatzeko ardura.
Eraberritzen den bigarrena
San Andreseko Gaztetxokoko eraberritzea, Musakolako Gaztetxokokoari gehituko zaio honenbestez. Iaz hasi ziren Musakolako Gaztetxoko berria kokatuko den lokala berritzeko obrak; Udalak lokala erosi ostean hain zuzen. "Agintaldi honetan, bi dira erabat eraberritu diren Gaztetxokoak: Musakolakoa eta San Andresekoa. Biak ala biek nerabeen zein hezitzaileen beharretara egokitzeko lanak izan dira, aisialdi eta heziketa zerbitzu hobeago bat eskaintzeko asmoz", esan du Fernandezek.
Gaztetxokoa bitartean Etxaluzen
Lanek irauten duten bitartean, ez da Gaztetxokorik faltako San Andresen. Behin behineko espazio hezitzailea Etxaluzeko bigarren solairuan, Solozar gelan egongo da kokatuta; ohiko ordutegiekin eta ohiko hezitzaile zein ekintzekin.