Ereindajaneko zuzendaritza taldeko Eider Murgoitio "oso pozik" agertu da irekierarekin: "Bide luzea egin behar izan dugu hona heltzeko. Hirugarren gunea dugu dagoeneko Arrasaten daramatzagun 14 urteotan; uste dugu lekualdaketak ezinbestekoa dugun komunitatea are gehiago indartuko duela. Ereindajanek ez du sekula erdigunean lokalik izan, eta ilusio handiz gaude".
Arrasateko Ereindajaneko koordinatzaile Edurne Kortabarriak ere zentzu berean egin du berba: "Erdigunean beste ikusgarritasun bat izango dugu eta ea bazkide kopurua handitzea lortzen dugun. Apustu handia egin dugu, eta espero dugu tamainako fruituak jasotzea". Gaur egun, Arrasateko Ereindajanen 403 bazkide dira; horietatik 22 dira bailarako ekoizleak eta gainerakoak bazkide-kontsumitzaileak.
