Urtarrilaren 2an, Musakolako igerilekuan emango diote hasiera Txikilandiari. Igerileku handian puzgarriak jarriko dituzte eta igerileku txikian berriz, material ugari egongo da haur eta familien eskura, hala nola; esterilak, txurroak edo tablatxoak. Ur parkea 10:30etik 13:30era egongo da zabalik. Arratsaldean eta urtarrilaren 3 eta 4an, Uarkapen eta Gaztetxean jarraituko du Txikilandiak.
Uarkapen, rokodromoa, jolas gunea, lau urtetik beherakoentzako gunea, ipuin txokoa, ohe elastikoak, puzgarriak eta gela iluna izango dira. Gaztetxean aldiz, aurpegi margoketa eta sormen gunea egongo dira. Gainera, bederatzi urtetik gorakoendako, Ekintzen laborategia ere prestatuko dute. Urtarrilaren 2an txapa, pegatina eta tatuaje tailerra jarriko dituzte; 3an, ihes bidea eta esperimentazio gunea egongo dira, eta, azken egunean, look aldaketa, ihes bidea eta Sua! jolasa. Disko festa batekin emango diote amaiera Ekintzen laborategia-ri, gaztetxean, 19:00etan.
Musikarik gabeko orduak
MondraTEA elkartearekin elkarlanean adostuta, aurtengo berritasunetako bat, musikarik gabeko orduak izango dira. Goizez, 10:30etik 12:00etara eta arratsaldez, 17:00etatik-18:00etara, musika etengo dute sentsibilitate sentsorial handiagoa duten haurrak erosoago sentiarazteko helburuarekin. "Neurri hau haurren beharrak kontuan izanik hartu da, eta aurreko edizioetan izandako esperientzietan oinarritzen da, non soinu jarraituek haur batzuengan nekea edo urduritasuna eragin baitzuten", azaldu dute antolatzaileek.
Horrekin batera, 12:00etan eta 18:00etan ipuin kontaketa eta karaokea izango dira egunero –ipuin kontaketa ipuin txokoan egingo dute, eta karaokea kantxa nagusian–. Herriko komertzioek eta inguruko elkarteek emandako produkturen zozketak ere egongo dira arratsaldez: "Parte hartzaileek sarreran emango zaien galdera erantzun beharko dute produktu ezberdinen zozketan sartzeko".
Sarrerak eta bonuak
Txikilandiako sarrerak eta bonuak egunean bertan eskuratu ahalko dira ekintzak izango diren guneetan. Prezioei dagokienez, 1-3 urte bitartekoen sarrerak hiru euro balioko ditu, eta, bonuak berriz, 5,50 euro. Lau urtetik gorakoen kasuan, sarrerak, 4 euroko prezioa izango du, eta, bonuak aldiz, 9 eurokoa. Bestetik, Belaunaldiartekotasun zinegotzia den Gladys Fernandezek gaineratu duenez, Arrasateko Udalak, 200 bonu bideratuko ditu familia zaurgarrietako haurrentzat: "Datorren astean gizarte zerbitzutatik mezu bat bidaliko zaie familia hauei, bonuaren bila joan daitezen".