Jokatutako lau partidetatik hiru irabazi ditu Arrasateko taldeak, Iturripen garaipen garrantzitsua lortu baitu David Peñak zuzentzen duen taldeak Siroko Gijonen aurka
Lehenengo laurdenean, defentsan partidua sartzea kosta egin zaio Arrasateko taldeari, baina erasoan bikain aritu dira markagailuko abantaila ondo kudeatzeko. Apurka defentsa sendotzen joan da Smartlog Ointxe! eta orduan aurkaria baino gehiago izan dira moredunak Iturripeko kantxan.
Azkeneko laurdenean Xixongo taldeak presio gogorra egin du, eta etxekoek sufritu egin dute. Arrasateko taldea apur bat erlaxatu egin da defentsan, baina azken emaitza 77-65ekoa izan da.
"Azken laurdenean apur bat trabatu egin gara erasoan, baina beste hiru laurdenetan nagusi izan garela esango nuke. Gure oinarria defentsa da, eta aktibatzen garenean erasoan ere asko nabaritzen dugu. Denboraldiaurrean eta jardunaldi hauetan egiten ari garen lanak saria izaten ari da lau norgehiagokatik hiru irabazi ditugu-eta. Hori, motibaziorako eta lanean jarraitzeko, ezinbestekoa da", azaldu du David Peña entrenatzaileak.