Iaztik hainbat jokalarik utzi zuten taldea, baina harrobiko jokalarien laguntzarekin badihardute denboraldian zehar Mojategin jokatuko duen taldea osatzen. Denboraldiaurrea gogorra izaten den arren, liga hasteko gogotsu daude bai jokalariak baita talde teknikoa ere. "Taldea eraikitzen ari gara berriro ere. Iaz jokalari dezentek utzi zuten taldea; tartean, beteranoek, eta gure asmoa jokalarik gazteak sartzea da", adierazi dute klubetik.
Jorge Davila izango da aurten ere Mondrako entrenatzailea. Iaz denboraldia hasita zegoela sartu zen talde zuri-morea zuzentzera Xuban Epelde entrenatzailearen lekukoa hartuta, eta lortu zuten mailari eustea. Aurten, denboraldi hasieratik taldearekin lanean egoteari garrantzi handia ematen dio Davilak: "Iaz urgentziekin sartu ginen eta saiatu ginen kontzeptu batzuk lantzen ahalik eta azkarren lehiakorrak izateko. Orain denbora dugu beste gauza batzuetan pentsatzeko eta guk zelaian erakutsi nahi duguna prestatzeko".
Iazkoa urte gogorra izan zela onartzen dute Mondrakoek, eta helburu nagusirik ezarri gabe, partida guztietan lehiakorrak izatea eta sailkapenean ahalik eta goren egotea da euren asmoa, taldeko kapitain Iker Pavonek dioenez: "Joan den denboraldian nahiko urte zaila izan genuen: ondo hasi ginen eta gero beherakada bat izan genuen. Entrenatzailez aldatu behar izan genuen eta Jorge [Davila] etorri zenetik hobeto ibili ginen. Ea aurten erregulartasuna izan eta urte lasaiagoa izatea lortzen dugun. Hortik aurrera, ahalik eta goren gelditzea izango da asmoa".
Orion hasiko dute liga txapelketa
Hiru lagunarteko gelditzen zaizkio Mondrari liga hasi aurretik: Urkiren aurka lehena, Bergararen aurkako derbia hurrena, eta Iru Bat taldearen aurkakoa azkena. Ohorezko Erregional mailako txapelketa Orioko taldearen aurka hasiko dute, Mendibeltz futbol zelaian.