56 kuadrilla eta eta 900 gazte inguruk parte hartu zuten bigarrenez egin den Gazte Olinpiadetan. Herriko hainbat plazetan egin zituzten jokoak egun osan zehar. Bazkalostean 28 talde finalaurdenetara pasa ziren, eta final handia Monterron parkean izan zen. Bertan lau talde aritu ziren lehian: goizeko jardunaldian lehen postuan sailkatu den Aerolinea Barata, iazko txapelduna Boniato Crew, Lolailo kuadrilla eta, azkena, garaile izan zen 99 kuadrilla.
Arrasateko Erraldoi eta Kilikien Konpartsaren 40. urteurrena topaketa batekin ospatu zuten. Horretarako, bost konpartsak eskaini zituzten euren ikuskizunak herriko txoko ezberdinetan: Ondalan Deustuko Konpartsa (Bilbo), Txantreako Konpartsa (Iruñea), Bermeoko Erraldoien Konpartsa eta Aretxabaletako Erraldoiak. Ikusmira handia sortu zuen topaketak, eta konpartsa bakoitzak bere emanaldiak eskaintzeaz gain, Herriko Plazan elkarrekin vals bat eta polonesa bat dantzatu zuten.
Atzo iluntzean, euskara erdigunera ekartzeko helburuarekin antolatu zuten beste behin Dragoi Jana AED-ko eta AEK-kako kideek. Eguraldi iragarpena zela eta, Herriko Plazan egin behar zuten afaria azkenean Biteri plazako arkupean egin zuten. 400 lagun izan ziren parrillan erretako txuleta dastatu zutenak.
Ekintzaz betetako asteburua izan den den arren, Arrasateko Sanjuanei ofizialki gaur eman zaie hasiera. Gaurkoan, jai giroak hartuko ditu Arrasateko kale eta plazak, beste urte batez; errementari dantza, sua eta danborrada izango dira protagonista nagusiak.