Ligako denboraldia hirugarren postuan amaituta, azken urratsa geratzen zitzaion Aitor Cortizasen taldeari denboraldia borobiltzeko; alegia, Errege Kopa jokatzeko txartela lortzea. Finalaurrekoetan Donipariren aurka bana berdinduta, ligako sailkapenean gorago bukatzeagatik lortu zuen Mondratek playoff-eko finala jokatzea. Finalean, liga bigarren postuan bukatu zuen Kukuyaga taldea izan zuten aurrean, eta hortaz, irabazteak besterik ez zion balio Mondrateri, Errege Kopa jokatzeko.
Partidua maldan gora jarri zitzaien arrasatearrei hasieratik, seigarren minuturako aurretik jarri baitzen Etxebarriko taldea. Eros Chinarrok lortu zuen markagailua berdintzea, baina bi minutuak egindako bina golekin, hiru eta batekoa ezarri zuten etxekoek markagailuan. Ez zuten amore eman arrasatearrek, eta Iker Uribesalgoren eta Julen Estrellaren gol banarekin eta Kevin Barrancaren bi golekin markagailua iraultzea lortu zuten, 3-5. Azken minutuetan estutu egin zuten etxekoek, markagailuko tartea gol bakarrera laburtuta, baina Mondratek ondo eutsi zion lau eta bostekoari, eta partidua irabaztea lortu zuen.