Ekitaldian, Ane Zuazubiskar bertsolariak eta Marta Eizagirre musikariak markaren kontakizun poetiko musikala egin dute. Herriko hainbat elkartetako kideak ere izan dira bertan; Ihabar Arriaran, Arrasate Rugby Taldeko kidea; Idoia Peñacoba, Mondragon Unibertsitateko idazkari orokorra; Fuityy Mahamud, Saharar komunitateko kidea; Eider Etxebarria, Bizipoz kooperatibako kidea; eta, Maria Oses, kulturgilea eta artista.
Hori gutxi balitz, eta eguraldia lagun, luntxa, tote bag bana eramateko aukera, photocalla eta txikienentzat Txatxilipurdik kudeatutako espazio berezi batez gozatu ahal izan dute bertara gerturatu direnak.
Marka berria, arrasatear identitatearen isla
Herri-marka berri hau, hiru elementuz osatuta dago: kontakizuna, leloa eta irudi grafikoa. Ate berriak zabalduz leloak bi helburu ditu. Arrasatearren izaera bidegilea islatzea, eta era berean, herritarrei euren herriaren etorkizunaren eraldaketan parte-hartzeko gonbita eginez.
Irudiak ate bat iradokitzen du, leloari men eginez. Hori bakarrik ez, herritarren iruditegian hain errotuta dauden herriko arkitektura eta dragoiaren azala ere irudikatu ditzakegu.
"Ez da logo bat, ezta kolore sorta bat ere. Tresna bat da, tresna kolektiboa, gainera" azaldu du Maider Morras alkateak. Arrasatearren nortasuna, elkarlana eta etorkizunerako ikuspegiak irudikatzen dituela azaldu dute Udaletik.