Jauzi Ekosoziala plataformak Euskal Herriko II. Ekotopaketak antolatu ditu aste bukaeran, eta mahai-inguruak, hitzaldiak, bertso-afariak, eta askotariko ekintzak egin dituzte Arrasateko gune ezberdinetan. Mahai-inguruak eta hitzaldiak Uarkape pilotalekuan eta Irati Topagunean izan dira, eta antolatzaileak oso gustura gelditu dira emaitzarekin, 200 lagundik gora elkartu baitira ekintza ezberdinetan.
"Asteburu polita eta aberatsa izan da. Eztabaida oso emankorrak eman dira, eta eduki oso sakonekoak. Jendeak erantzun egin du, gainera, 200 lagundik gora etorri dira-eta ekintzetara. Lanerako gai eta ideia berriekin irten gara Ekotopaketetatik", azaldu du Jauzi Ekosozialako kide Nerea Zuluagak.
"Kataluniatik, Andaluziatik, Iparraldetik... etorri dira eragileak eta ekologistak, eta haiekin hausnartzea oso aberatsa izan da. Beste bide batzuk ere zabaldu dizkigu haien ikuspegiek", gaineratu du Zuluagak.
