Enpresa transmititzeko prozesuan babesa eta aholkularitza eskaintzen ditu elkarteak, programaren bitartez. Prozesu luze eta konplexuak izaten dira, ordea, eta horregatik badira kontuan hartu beharreko hainbat faktore: denborarekin hastea edota kultura-transmisioa lantzea.
Hainbat fase ditu prozesuak: jabeekin elkarrizketak, enpresaren egoeraren azterketa, bideragarritasun-diagnostikoa, transmisio-aukerak, abiapuntuko prezioaren identifikazioa, erosle potentzialei aholkularitza eta laguntza ematea… Baina enpresetara iristea da horien guztien artetik lehena eta, sarritan, zailena. Horregatik, preskriptoreak batu dituzte gaurko aurkezpenean: mankomunitate, garapen agentzia, udal edota aholkulariak, horietako atea izaten delako, maiz, enpresek jotzen duten lehena. Beharra areagotzen doa, gainera, industria sektorean eta merkataritzan, batez ere.
Informatzearen garrantzian jarri du azpimarra Debagoieneko Mankomunitateko Garapen Agentziako arduradun Koldo Azkoitiak, eta pausoa ematera gonbidatu ditu enpresak. 2020an hasi ziren gaurkoa moduko jardunaldiekin, Geroa Bermatuz programaren bitartez. Hainbat izan dira, orduz geroztik, negozioa oinordekoen eskuetan utzi duten enpresak.
