Puntuak hirunaka pilatzera ohitu da Mondrate denboraldi honetan. Hamasei norgehiagotatik hamabitan lortu du irabaztea, eta azkenengo porrota duela hiru hilabete jaso zuen. Hala ere, Antiguokoren boladaren itzalpean daude, donostiarrek partidu bakarra berdindu eta beste denak irabazi dituztelako. Aurten txapeldunak bakarrik izango du mailaz igotzeko aukera, baina oraindik partidu asko geratzen dira eta badute sorpresa emateko ilusioa.
Gaur argi ikusi da joko-puntu bikainean daudela. Azken bigarren sailkatuta dagoen Lauburu jaso dute etxean, eta atsedenaldira 1-0ekoarekin joan dira. Markagailua estu egon arren, aukera mordoxka sortu dituzte etxekoek, baina Ibarrakoek ondo defendatu dute.
Bigarren zatiari ekin eta berehala hasi da gol festa. Markagailuan zuloa egiteko baliatu dute epaileak Lauburuko jokalari bat kaleratzea, eta zirt-zart batean 5-0 jarri dira. Bisitariek atezain-jokalaria atera dute golen bat egiteko asmoz, baina ez dute ate aurrean asmatu, eta kontraerasoetan golak jasotzen jarraitu dute. Tartean, Jonatan Barrionuevo atezainak area batetik bestera jaurtitako bat. Beste goleatzaileak Iker Uribesalgo (lau gol), Jokin Oruna (bi gol) eta Jokin Rayo (gol bat) izan dira. Defentsan egindako lana ere nabarmentzekoa izan da, lehenengo aldiz lortu baitute golik ez jasotzea.
Datorren astean Gernikari egingo dio bisita Mondratek.
