48 urte igaro dira Jose Maria Arizmendiarrieta hil zenetik, eta beste urte batez, Arizmendiarrietaren Lagunak Elkarteak haren omenezko ekitaldia egin du. Lourdes Idoiagak, Arizmendiarrietaren Lagunak Elkarteko presidenteak, dio jende askok uste duela "antzinako pentsamenduekin bueltaka" ari direla; hala ere, "Arizmendiarrietaren Lagunak Elkartetik etorkizunerako begirada batekin lanean" ari direla aitortzen du presidenteak; izan ere, Arizmendiarrietaren hitzek "garrantzia izaten jarraitzen dute gaur egun", Idogaiaren hitzetan.
Arizmendiarrietaren urteurrena ospatzeko, hitzaldia eman zuen Perez Iglesias sailburuak, Kultura, oparotasuna eta demokrazia; zientzia bultzatzen duen hirukote bertutetsua izenpean; hiru alderdi horiek gaur egungo ikuspegi akademikoan izaten jarraitzen duten garrantzia azpimarratu zuen Perez Iglesiasek eta, gainera, unibertsitateek gaur egun izan behar dituzten erronkez ere mintzatu zen.
Aurrerantzean, Arizmendiarrietaren Lagunak Elkarteak lanean jarraituko du, eta hark utzitako ondarea liburu gisa plazaratzeko asmoa dutela esanaz amaitu zuen Idoiagak, urteurren ekitaldiko agerraldia.
