Sebero Altuben hasi dituzte ospakizunak. Puzgarriak eskutan, kalejiran joan dira umeak, gurasoak, Txatxilipurdiko langileak eta herritarrak, Kulturolaraino. Bidean, dantzak eta erronka-jolasak egin dituzte.
Bertso eskolako kide baten agurrarekin hasi dute ekitaldi nagusia. Ostean, Txatxilipurdiren 30 urteen errepasoa jasotzen duen bideoa erakutsi dute. Elkartearen errepasoa, erabiltzaile eta langile izan direnen eta direnen begietatik eta bizipenetatik. "Herriaren ondare", "existituko ez balitz, asmatu beharrekoa", "familia", "euskarazko aisialdian erreferente"... Horrela definitu dute, besteak beste, bideoan parte hartu dutenek zer den Txatxilipurdi beraiendako.
Irudi berria
Atzera-begiratuaren ostean, etorkizunera begira ipintzeko unea heldu da. "Amesten" jarraitzeko 30 arrazoi irakurri dituzte, Txatxilipurdiko hiru langilek. Duela 30 urte markatutako bide beretik jarraitzeko konpromisoa hartu dute, eta horretarako irudi berria izango dute: laranja eta more koloreak ditu oinarri.
