Kanpaiek 20:30ak jo baino lehen jendez gainezka zegoen Arrasateko Herriko Plazan, Maritxuren miraria zein izango zain. Asko eta asko ziren Palestinari keinu bat egingo ziola uste zutenak, hala izan baita aurtengo eskapularioan ere; hala ere, sorpresa hartuko zuten haietako askok, ez baitu loturarik izan.
20:30ean itzali dituzte plazako argiak, eta txarangaren lehen doinuek eman dute mirariaren lehen pista: Hator, Hator gabon kanta. Segundo gutxi batzuetara agertu da Maritxu Kajoiren barrenean Nicolas Maduro, Venezuelako presidentea, eta bere ardura izan da tela morez ezkutatuta zegoen mezu bat azaleraztea, suziriek argiztatua: Eguberri on.
