San Pankrazio eguna ospatzen dabiltza Mondragon Unibertsitateko Goi Eskola Politeknikoan, eta, hutsik egin gabe, arrautza jaurtiketa lehiaketa egin dute gaur goizean zehar. 60 ikaslek hartu dute parte, hogei taldetan banatuta, eta hiru kategoriatan lehiatu dute: hegaldirik luzeenari dagokionez, Unax Zangitu eta Jokin Madina ikasleek –Zlatan taldea– erdietsi dute garaipena; hegaldirik politena, berriz, Amaia Resanok, Ekaitz Alkantarak eta Aitor Inurritak –Fiat taldea– lortu dute; eta azkenik, Ainhoa Alonsorentzat izan da diseinurik onenaren saria, Quetzal proiektuarekin.
25 urte bete dituen lehiaketa
Urtero antolatu ohi den ekimen bat da, eta bi helburu ditu: batetik, "parte-hartzaileen ahalmen zientifiko-teknikoak" ebaluatzea eta, bestetik, "ikasleen artean motibazioa sustatzea". Horretarako, ikasleek oilo arrautza ertain bat –egosi gabekoa–, koloretako kartoi mehea –200 gramo–, soka –fardel haria– eta ukipen-kola erabilita, arrautza jaurtitzeko tramankulu bat sortu behar dute, jaurtitzean arrautza apur ez dadin; azken batean, hori da lehiaketaren funtsa. Hala, unibertsitateko liburutegiko eraikinetik, 15 metroko garaieratik, bota dute tramankulua.
