La sed del minotauro ikuskizuna eskainiko du Khea Ziater konpainiak domekan, 19:30ean, Amaia antzokian, eta Txubi Fernandez de Jauregi, Arrate Etxeberria, Miren Gaztañaga, Leire Ucha, Jon Ander Urresti eta Ainhoa Artetxe izango dira oholtza gainean arituko diren aktoreak. Drama dibertigarri bat da eta sarrerak hamar eurotan daude salgai Arrasate.eus atarian.
Khea Ziater konpainiako zuzendariari, Alex Gerediagari, elkarrizketa egin dio Aitziber Aranburuzabala kazetariak Arrasate Irratiko Zaku bete kontu saioan, eta hauxe esan du: "Bost pertsonaia dira obra egingo dutenak, kafe-taberna batean kokatuta, eta maitasunari buruz hitz egingo dugu; maitasuna da zoriontasunera bidean beharrezkoa den zerbait. Min handia sortzen duen maitasun gaztea agertuko da, egunero borroka eskatzen duen maitasuna… Hori horrela, looser profila duten protagonistak ikusiko ditugu, nahiz eta, bihotz handia dutenez, gero guztiak maitatuko dituzten ikus-entzuleek".
